У забойстве віленскага беларуса шукаюць "расійскі след"
Такую версію ў інтэрв’ю тэлеканалу LNK выказаў літоўскі парламентарый Арвідас Анушаўскас.
Нагадаем, што ўначы на 6 сакавіка ў Вільні быў жорстка забіты Раман Вайніцкі — прэзідэнт Асацыяцыі беларускіх арганізацый Літвы і кіраўнік клуба аматараў беларускай культуры "Сябрына".
На думку Анушаўскаса, Вайніцкі мог замінаць Расіі ў спробах аб’яднаць нацыянальныя меншасці супраць літоўскай дзяржавы і яе нацыянальнай палітыкі. Цягам апошняга году Вайніцкі не раз выказваўся ў прэсе супраць спробаў далучыць беларускую дыяспару ў Літве да пратэстаў і грамадскіх і палітычных акцыяў супраць законаў Літвы ў сферы адукацыі і культурнай дзейнасці нацыянальных меншасцяў, перадае Радыё "Свабода".
Фота Рамана Вайніцкага — DELFI
