Украінцы патрабуюць ад Польшчы спыніць пераслед беларуса
Яны перадалі зварот 28 ліпеня ў консульства Польшчы ва ўкраінскім горадзе Луцку.
Ініцыятарам звароту выступіла ўкраінская арганізацыя Цэнтр "Супрацоўніцтва без межаў". Яны патрабуюць ад Генеральнай пракуратуры Польшчы спыніць палітычны пераслед беларускага грамадскага актывіста Андрэя Жукаўца. Такі ж ліст будзе таксама накіраваны Генеральнаму пракурору Польшчы Анджэю Шарамету.
Аўтары звароту адзначаюць, што ўжо 10 гадоў супрацоўнікі суда і пракуратуры Беластока спрабуюць засудзіць Жукаўца і экстрадаваць яго на тэрыторыю Беларусі. Факты фальсіфікацый дакументаў неаднаразова выяўляліся, але справа супраць Жукаўца так і не была спыненая, адзначаецца ў дакуменце.
Калі Жукаўца не перастануць пераслдаваць, Цэнтр "Супрацоўніцтва без межаў" будзе паведамляць украінскай грамадскасці пра палітычны пераслед беларускага актывіста з боку польскай пракуратуры і суда.
Нагадаем, што прадпрымальнік Жукавец у Беларусі матэрыяльна падтрымліваў "Малады фронт", праваабаронцаў, апазіцыю. У 1999 годзе ён з'ехаў з Беларусі і папрасіў палітычнага прытулку ў Польшчы.
