Віцебскае прадпрыемства зрабілі вінаватым у тэракце 11 красавіка
На прадпрыемстве, дзе працаваў адзін з абвінавачаных у мінскім тэракце, мяняюць кіраўніцтва.
Цалкам ці часткова будзе звольнена адміністрацыя Віцебскага завода трактарных запчастак, пакуль невядома. Але па выніках праверкі, якая праводзілася пасля падзеяў 11 красавіка, “на заводзе выяўлены сур’ёзныя недахопы у ідэалагічнай, выхаваўчай, інфармацыйна-прапагандысцкай рабоце, у кадравай службе”. Цікава, што праца ў гэтых кірунках яшчэ год таму лічылася выдатнай і пра яе ўхвальна пісалі на старонках дзяржаўнай газеты “Віцьбічы”.
Згодна з вынікамі праверкі, на прадпрыемстве, у прывактнасці, кепска выконвалі Дырэктыву №1 “Аб захадах па ўмацаванні грамадскай бяспекі і дысцыпліны”. І было прызнана, што “прычынай шматлікіх парушэнняў стаў нізкі ўзровень арганізацыі працы кіраўніцтва і галоўных спецыялістаў завода”. Замест звольненых прадстаўнікоў адміністрацыі Міністэрства прамысловасці збіраецца адшукаць новыя ініцыятыўныя кіраўнічыя кадры, паведамляе “Праваабарончая хроніка”.
