Са зваротаў на Ўсебеларускі сход цалкам вырашаны кожны пяты
Найбольшая колькасць зваротаў, якія паступілі на гарачую лінію чацвёртага Ўсебеларускага народнага сходу, тычыліся недахопаў працы камунальных службаў.
Амаль 20% усіх зваротаў цалкам вырашаныя. Пра гэта паведаміў начальнік аддзела лістоў і прыёму грамадзян апарата Савета Міністраў Аляксандр Коўшар.
Таксама больш як па палове званкоў, тэлеграм і лістоў былі дадзеныя тлумачэнні.
Коўшар: "Нездавальняльны тэхнічны стан асобных жылых дамоў, просьбы пра іх рамонт, тэрміны і якасць правядзення рамонту, кошт паслуг ЖКГ, падаўжэнне тэрмінаў атрымання і выкарыстання чэкаў "Жыллё"... Пытанні абмяркоўваліся на працоўных нарадах у аблвыканкамах, з заяўнікамі адбыліся гутаркі, прапанаваліся рашэнні, даваліся неабходныя тлумачэнні".
Найбольшую актыўнасць у зваротах на гарачую лінію выявілі пенсіянеры: ад іх паступіла каля паловы ўсіх скаргаў.
