“Салідарныя з Беларуссю” пад пытаннем, у арганізатараў не хапае грошай

Арганізатары варшаўскага канцэрта “Салідарныя з Беларуссю”, які праводзіцца пачынаючы з 2006 года, звярнуліся да грамадскасці з просьбай ахвяраваць грошы на мерапрыемства. Ім не хапае каля 2700 долараў. Калі сродкі не знойдуцца — канцэрт давядзецца адмяняць, сцвярджаецца ў заяве ініцыятывы “Вольная Беларусь”. “На жаль, з прычыны крызісу наша фінансавае становішча выглядае даволі драматычным. Польскае тэлебачанне адмовіла ў супрацоўніцтве, а гарадскія ўлады напалову знізілі сродкі на нашу імпрэзу. За 2 тыдні мы павінны сабраць 10.000 тысяч злотых (каля 2,7 тысяч долараў) інакш мерапрыемства, якое мы рыхтавалі паўгода папросту не адбудзецца. Таму мы вырашылі звярнуцца да вас з просьбай аб дапамозе. Просім любой падтрымкі. Нават 100 ці 200 злотых будуць для нас вельмі важнымі. Кожны, хто нам дапаможа з’явіцца на старонцы ініцыятывы “Вольная Беларусь”, а таксама на старонцы канцэрту, у якасці суарганізатара акцыі”.

Як пісала раней Еўрарадыё, польскае тэлебачанне адмовілася здымаць канцэрт. З-за гэтага мерапрыемства страціла вялікую частку фінансавання. У выніку на “Салідарных” запрасілі толькі тых музыкаў, якія пагадзіліся прыехаць за свой кошт і сыграць задарма.