У Беларусі вырошчваецца толькі 9% свежых кветак на продаж

У цяпліцах Беларусі выгадоўваецца ўсяго 9% свежых кветак, якія ідуць на продаж. Вытворчасць кветак у прамысловых цяпліцах Беларусі займае каля 9% рынку. І, нягледзячы на пратэкцыянісцкія меры ўраду, гэтая лічба не мае тэндэнцыяў да павелічэння, паведамляе "РБК. Даследаванні рынкаў".

Кветкі, якія вырошчваюцца ў нашай краіне, не вылучаюцца шырокім асартыментам. Іх якасць саступае імпартным кветкам у першую чаргу з прычыны "нестандартнасці" кветкі. Бутоны беларускіх ружаў у сярэднім у 2 разы меншыя, чым прывезеных з Галандыі, Эквадора або Польшчы. У той жа час, адпускныя кошты адрозніваюцца не так прыкметна, што і вядзе да перавагі імпартнай прадукцыі ў квяцярнях.

Асноўным пастаўшчыком кветак у Беларусь з'яўляюцца Нідэрланды: іх доля перавышае 60%. Частка кветак з галандскіх аўкцыёнаў паступае праз Расію.

Экспарт кветак з Беларусі ажыццяўляецца ў Расію, але яго памеры нікчэмна малыя.