У Літвы застаюцца пярэчанні наконт беларускай АЭС

У Літвы застаюцца пярэчанні па пададзенай Беларуссю Справаздачы пра ацэнку ўздзеяння будучай АЭС на навакольнае асяроддзе (АУНА).
Як інфармуе БелаПАН, афіцыйная Вільня абвергла інфармацыю, агучаную кіраўніком нацыянальнай камісіі па радыяцыйнай абароне пры Савеце міністраў Беларусі Якава Кенігсберга. 24 лістапада ён, у прыватнасці, заявіў, што Літва зняла ўсе ранейшыя пярэчанні па АУНА.

Літоўскае МЗС у адказ заявіла, што беларускі бок дагэтуль не даў адказаў на ўсе пытанні наконт будучай АЭС. У прыватнасці, Літва не атрымала адказу, чаму для пабудовы АЭС была абраная менавіта Астравецкая пляцоўка, якая знаходзіцца за 50 кіламетраў ад Вільні.