У Слонімскім раёне гарэў цеплавоз грузавога цягніка

Пажар узнік у маторным адсеку цеплавоза грузавога цягніка ў Слонімскім раёне ў двух кіламетрах ад станцыі Іса. Цягнік з 29-ці вагонаў рухаўся са Слоніма да Баранавічаў.  Спачатку пажар машыністы патушылі самастойна, аднак праз 10 хвілін агонь зноў з'явіўся. На дапамогу давялося выклікаць пажарны цягнік з Баранавічаў.

У выніку пажар удалося патушыць, аднак рух цягнікоў у накірунках Гродна – Баранавічы і Баранавічы – Гродна быў прыпынены на 2 гадзіны. У гродзенскім МНС прычынай гэтага пажару называюць прарыў у паліўным трубапровадзе.

Грузавы цягнік адбуксіравалі на станцыю Баранавічы. Паведамляецца, што ён вёз лес, збожжа, чорны метал і картон, большасць вагонаў былі пустыя.

Сяргей Апановіч, Еўрарадыё, Гродна