У Віцебску мытнікі канфіскавалі 900 кг вопраткі
Кошт кантрабанды ацэньваецца ў 360 мільёнаў рублёў.
Віцебскія мытнікі канфіскавалі буйную партыю вопраткі і галантарэйных вырабаў агульнай вагой каля 900 кілаграмаў, паведамляе БЕЛТА.
У пункце пропуска “Урбаны” спынілі грузавік MAN, які ішоў у нашу краіну з Латвіі. Згодна з дакументамі, у аўтамабілі была вопратка сэканд-хэнд, аднак сярод ужываных тавараў знайшлі болей за 2 тысячы адзінак новай вопраткі, а таксама сумак і рэмняў з фабрычнымі этыкеткамі. Гэты новы тавар не быў заяўлены ў суправаджальных дакументах.
Незаконна ўвезены тавар каштуе прыкладна 360 мільёнаў рублёў. Па гэтым факце мытня распачала адміністратыўны працэс.
Фота з архіву
