Вечар памяці Арнольда Пячэрскага пройдзе на Управе БНФ

Сёння а 6-й увечары на Управе БНФ пачнецца вечар памяці Арнольда Пячэрскага, зладжаны Кардынацыйнай радай індывідуальных прадпрымальнікаў Мінска.

Арнольд Пячэрскі быў адным з фундатараў прадпрымальніцкага руху ў Беларусі, першым кіраўніком агульнанацыянальнага стачкама прадпрымальнікаў, лідэрам прафсаюза прадпрымальнікаў “Садружнасць”.

Спадар Пячэрскі быў даверанай асобай кандыдата ў прэзідэнты Міхаіла Чыгіра, прымаў актыўны ўдзел у падрыхтоўцы выбараў прэзідэнта, прызначаных Вярхоўным Саветам Беларусі 13-га склікання на 16 траўня 1999 года.

Арнольд Пячэрскі загінуў 24 красавіка 1999 года пад Крупкамі ў аўтакатастрофе. Сайт “Аб’яднанай грамадзянскай партыі” сцвярджае, што ёсць падставы лічыць гэтую катастрофу палітычнай расправай.