Webometrics паставіў БДУ ў тройку найлепшых універсітэтаў СНД
Белдзяржуніверсітэт увайшоў у тройку найлепшых універсітэтаў СНД у новай рэдакцыі Сусветнага вэбаметрычнага рэйтынгу ўніверсітэтаў, паведамляе БЕЛТА. У новай рэдакцыі рэйтынга БДУ заняў 584 месца ў свеце і ўзняўся ў параўнанні з мінулым годам на 25 пазіцыяў (у жніўні 2015 года быў на 609 месцы).
Усяго ў Webometrics улічваюцца дадзеныя болей як 22 тысяч вышэйшых навучальных установаў з усяго свету. Пры гэтым БДУ зноў увайшоў у тройку лідараў найлепшых універсітэтаў СНД і саступіў толькі Маскоўскаму дзяржаўнаму ўніверсітэту (134-е месца ў сусветным рэйтынгу) і Санкт-Пецярбургскаму дзяржаўнаму ўніверсітэту (462-е месца ў свеце).
Што да сталічных універсітэтаў іншых суседніх краін, то Варшаўскі ўніверсітэт заняў 282-е месца, Віленскі — 689-е, Латвійскі ўніверсітэт на 897-м, а Кіеўскі нацыянальны ўніверсітэт — на 1023-м месцы.
БДУ мае найлепшы рэйтынг і сярод айчынных ВНУ. На другім месцы пасля яго стаіць Гродзенскі дзяржаўны ўніверсітэт (2091-я пазіцыя ў свеце), на трэцім — Беларускі нацыянальны тэхнічны ўніверсітэт (2504-ы радок). У Беларускага дзяржаўнага ўніверсітэта інфарматыкі і радыёэлектронікі 3043-е месца ў свеце, а замыкае пяцёрку найлепшых беларускіх ВНУ Беларускі дзяржаўны тэхналагічны ўніверсітэт (3537-е месца ў свеце).
Рэйтынг Webometrics Ranking of World Universities цягам апошніх дзесяці год складае іспанская даследчыцкая лабараторыя Laboratorio de Internet. Спіс абнаўляецца двойчы на год — у студзені і ў жніўні. Вышэйшыя навучальныя ўстановы ацэньваюцца па чатырох паказніках, якія характарызуюць узровень навуковых публікацый і прысутнасць універсітэтаў у сусветнай інтэрнэт-прасторы: уплыў (цытаванасць сайта), прысутнасць (памер сайта), адкрытасць (колькасць файлаў па дадзеных пошукавай сістэмы Google Scholar) і якасць (колькасць публікацыяй супрацоўнікаў універсітэта, якія трапілі ў 10% найбольш цытаваных у свеце па звестках навукаметрычнай базы дадзеных Scopus.
