З-за спёкі ў гарадах Беларусі будуць перасаджваць дрэвы (фота)

У Бабруйску ад анамальнай спёкі пачало сохнуць лісце на ліпах, каштанах і клёнах. Як распавяла аграном “Бабруйскзеленгасу” Таццяна Аніськова, большасць раслінаў схільныя пазбаўляцца ад лісця дзеля захавання вільгаці. Такім чынам у дрэваў уключаецца працэс самазахавання. “Мы чакаем спецыялістаў з Інстытуту эксперыментальнай батанікі з Мінску, - распавяла Таццяна Аніськова. – Вось яны канчаткова высветляць, з чым звязана высыханне лісця на дрэвах. Але з іх словаў ужо вядома, што сітуацыя падобная па ўсёй краіне. У Мінску падобная экспертыза ўжо праводзілася – стала вядома, што не толькі спёка, але і агульны стан экалогіі апошніх гадоў, прыводзіць да таго, што дрэвы проста не могуць выжыць у нашых гарадах”.

Па словах спецыяліста, зараз усё часцей такія дрэвы спілоўваюць. Замест іх будуць садзіць тыя віды, якія лягчэй пераносяць спёку.