ЗША абвінавачваюць урад Венесуэлы ў сувязях з калумбійскімі баевікамі

У сувязях з калумбійскімі баевікамі абвінавачваюць некалькіх членаў ураду Венесуэлы Злучаныя Штаты.  Памочнік Дзяржсакратара ЗША Томас Шэнан, кіраўнік дыпламатычнай місіі ЗША ў Лацінскай Амерыцы, заявіў, што файлы, знойдзеныя на камп'ютары аднаго з камандзіраў калумбійскіх баевікоў у сакавіку, пацвярджаюць сувязь шэрагу афіцыйных асобаў Венесуэлы з імі, інфармуе Reuters.

Нагадаем, 10 траўня іспанскае выданне "Эль Паіс" апублікавала артыкул пра тое, што Венесуэла з дапамогай Беларусі мела намер пастаўляць зброю паўстанцам з Рэвалюцыйных узброеных сілаў Калумбіі.

Доказам гэтага называўся ліст, знойдзены ў камп'ютары забітага аднаго з лідэраў паўстанцаў. У ім, у прыватнасці, згадваецца нейкі "беларускі сябар", які займаўся вырашэннем пытання з пастаўкай зброі.

Венесуэльскія ўлады і Дзяржсакратарыят Савета бяспекі Беларусі назвалі гэтыя звесткі "выдумкай" і "правакацыяй".