І мітрапаліт Юзаф Станеўскі, і мітрапаліт Веніямін чамусьці ідуць на гэтае супрацоўніцтва і абдымаюцца-цалуюцца з Лукашэнкам на камеру. Я б зразумеў сэнс гэтага, каб, напрыклад, мітрапаліт Веніямін пацалаваўся з Лукашэнкам, а потым мы б убачылі, што праз некаторы час выпусцілі некалькі палітвязняў ці палепшылі ім умовы ўтрымання. Каб была такая сувязь, тады б не было пытанняў.
Але праблема ў тым, што такой сувязі няма — гэта проста ўмова, пры якой цэрквы могуць існаваць. Гэта тычыцца ўсіх канфесій у Беларусі: і каталікоў, і праваслаўных, і пратэстантаў. Яны вымушаны супрацоўнічаць, і няма нікога лепшага ці горшага — гэта проста нашыя горкія абставіны.
Рэжым выкарыстоўвае цэрквы, каб Лукашэнка мог лепш сядзець на сваім троне.
Што тычыцца менавіта Грэма — гэта таксама кавалак вялікай гульні. Такі ж самы мэсэдж ягонымі вуснамі быў адпраўлены ўсім беларускім пратэстантам: маўляў, глядзіце, адзін з самых знакамітых пастараў у свеце таксама падтрымлівае рэжым.
Нібыта ягонымі вуснамі Бог кажа, што Лукашэнка — сапраўдны прэзідэнт, і хай сядзіць і не аддае ўладу. Гэтая малітва за Лукашэнку і Пуціна — абсалютная перамога рэжыму і падпарадкаванне пратэстанцкай супольнасці. Гэта вынік палітыкі, дзе ўсё ў краіне павінна служыць рэжыму, інакш яно будзе знішчана.
— Але хіба царква не павінна маліцца за ворагаў? У Евангеллі сказана: “Любіце ворагаў вашых і маліцеся за тых, хто вас пераследуе”.
— Так, нават мы ў сваім беларускім прыходзе ў Вільні таксама молімся, але мы вельмі чотка гэта прагаворваем.
- Спачатку мы молімся за ўсіх беларусаў, якія вымушана пакінулі свае дамы і Радзіму, каб Госпад дапамог ім вярнуцца ці даў новы дом у выгнанні.
- Потым мы молімся за ўсіх несправядліва зняволеных, каб яны хутчэй выйшлі на волю.
- А потым мы молімся за тых, хто чыніць гвалт, прыгнёт і беззаконне, — каб Госпад даў ім розум пакаяцца і адкінуць тое, што яны робяць.
Мы не проста абстрактна молімся за нейкія “ўлады”, а прагаворваем: хто ёсць дабро, а хто зло, хто ахвяра, а хто гвалтаўнік. Мы просім, каб Госпад прыняў гвалтаўнікоў у Свае рукі, нешта з гэтым зрабіў і дапамог нам вытрымаць. Гэта больш справядлівы, прамы і чэсны варыянт малітвы.
Калі Грэм казаў, што будзе маліцца за Лукашэнку, гэта магла б быць менавіта такая малітва, але гэта не было прагаворана. Калі ты едзеш у Беларусь, ты павінен падумаць, якой будзе ўмова твайго з’яўлення і як рэжым выкарыстае твае словы для самалегітымізацыі.
На маю думку, карысці ад гэтага будзе значна менш, чым рэальнай шкоды.
