З Егіпта збіраюцца дэпартаваць 68-гадовую беларуску
Ганна Лотыш 17 ліпеня выехала з сектара Газа, дзе праходзіць ізраільская ваенная аперацыя. Потым сваякі страцілі з ёй сувязь.
Як паведаміў прэс-сакратар беларускага МЗС Дзмітрый Мірончык, 20 ліпеня Ганну Лотыш даставілі ў паліцэйскі ўчастак у населеным пункце Аль-Арыш ў 50 км ад памежнага пераходу "Рафах". Як інфармуе БелаПАН, нашу суайчынніцу затрымалі на мяжы Егіпта за парушэнне пашпартна-візавага рэжыму і незаконнае перасячэнне мяжы.
Дачка жанчыны Віялета Абу-Насар паведаміла, што яе маці Ганна Лотыш ў свой час трапіла ў сектар Газа нелегальна — па падземных кантрабандысцкіх тунэлях. Яна падазрае, што гэтая акалічнасць пры адстунасці штампаў у пашпарце магла пры выездзе стаць падставай для затрымання пажылой жанчыны егіпецкімі памежнікамі.
Па словах дачкі, у Ганны Лотыш хворае сэрца і павышаны ціск.
Фота — wikipedia.org
