Брэстаўчаніна, які зладзіў перфоманс каля аблвыканкаму, вызвалілі з міліцыі
Пратакол аб адміністрацыйны правапарушэнні суд вярнуў міліцыянтам на дапрацоўку.
Як распавядала Еўрарадыё, 15 снежня грамадскі актывіст зрабіў зварот на прыступках Брэсцкага аблвыканкаму. Там ён пакаяўся за грахі беларускіх уладаў перад сваім народам. Малады чалавек быў апрануты ў строй біблейскага прарока з чырвонай фарбай на звязаных руках, якая сімвалізавала кроў беларусаў.
Праз 10 хвілін пасля акцыі Чаркашына затрымала міліцыя, і яго адвезлі ў Ленінскі РУУС. Адтуль актывіста забралі санітары. Ноч ён правёў ў псіхіятрычным стацыянары. Аднак на наступны дзень яго вярнулі ў міліцэйскі пастарунак, дзе склалі адміністрацыйны пратакол і пакінулі ў ІЧУ. Дарэчы, псіхіятрычны агляд медыкаў прызнаў яго цалкам здаровым.
У судзе Ленінскага раёна 17 снежня мусіў адбыцца разгляд справы Чаркашына. Каля 11-й гадзіны міліцыянты прывезлі яго ў суд, аднак адтуль зноў вярнулі ў РУУС.
Прыкладна ў 12.15 Чаркашына вызвалілі з райаддзелу — да "першага тэлефанавання". Як паведаміў у каментары Еўрарадыё сам актывіст, міліцыянты склалі адміністрацыйны пратакол з памылкай. Днямі яго чакае новае паседжанне суда.
