"Мой дом у Гродне" — Пачобут пацвердзіў жаданне вярнуцца ў Беларусь у верасні

Журналіст Анджэй Пачобут не змяніў планаў вярнуцца ў Гродна. Ён збіраецца працаваць і займацца тым, чым займаўся да арышту. Пра гэта экс-палітвязень паведаміў на брыфінгу для польскіх журналістаў у Беластоку 10 чэрвеня, піша hrodna.life.

Пачобут пацвердзіў, што плануе вярнуцца ў Беларусь у верасні перад з’ездам Саюза палякаў. XI З’езд Саюза палякаў у Беларусі пройдзе ў Гродне 13 верасня, напісала ў сваіх сацсетках Анжаліка Борыс.

"Я б не пагадзіўся з’ехаць, калі б не атрымаў пашпарт, калі б не быў упэўнены, што змагу вярнуцца. Я б хацеў вярнуцца дадому. Мой дом у Гродне. Так здарылася, так выглядае гісторыя, што палякі жывуць у Гродне, у Беларусі. Тое, што я раблю, я раблю для палякаў, якія жывуць у Беларусі і знаходзяцца ў цяжкім становішчы сёння", — пракаментаваў Пачобут.

Ён дадаў, што на Саюз палякаў улады ў Беларусі ціснуць ужо 20 гадоў, і ўвесь гэты час ён прысутнічае ў гэтай гісторыі. На думку Пачобута, яго прысутнасць пойдзе на карысць арганізацыі.

Журналіста і актывіста Саюза палякаў у Беларусі Анджэя Пачобута арыштавалі 25 сакавіка 2021 года і асудзілі на восем гадоў зняволення. На волю ён выйшаў сёлета 28 красавіка ў рамках абмену.