Навучэнец каледжа ўчыніў страляніну на вуліцах Баранавічаў
Здарэнне адбылося ў ноч на 17 лістапада.
Як паведамляе прэс-служба брэсцкай абласной міліцыі, да праваахоўнікаў уначы звярнуўся мужчына. Ён заявіў, што на вуліцы невядомы хуліган двойчы стрэліў у яго з пнеўматычнай зброі.
Па гарачых слядах міліцыянты вылічылі і затрымалі стралка. Ім апынуўся 17-гадовы студэнт мясцовага каледжа машынабудавання. Пры сабе ён меў газабалонны пнеўматычны пісталет МР, з якога і ўчыніў "страляніну".
На маладога чалавека пачалі крымінальную справу. За хуліганства з ужываннем зброі яму пагражае да 10 гадоў пазбаўлення волі.
Фота — gunsite.narod.ru
