Арганізатары "плюшавага дэсанту": Эрыксан нічога не ведаў пра акцыю
Пасол Швецыі ў Мінску Стэфан Эрыксан нічога не ведаў ні пра падрыхтоўку, ні пра правядзенне "плюшавага дэсанту" над тэрыторыяй Беларусі.
Таксама ён не меў ніякіх кантактаў з арганізатарамі гэтай акцыі — прадстаўнікамі Studio Total. Пра гэта БелаПАН заявіў заснавальнік шведскай піяр-кампаніі Studio Total Пэр Кромвел.
Інфармацыю ў СМІ пра тое, што ў СМС-паведамленнях шведаў было згадана імя Стэфан, Кромвел растлумачыў наступным чынам: "Стэфан — гэта фатограф, які не меў абсалютна ніякага дачынення да акцыі і не рабіў ніякіх здымкаў".
Кромвел, чыё сапраўднае прозвішча Эрыксан, таксама заўважыў, што не знаходзіцца ў сваяцкіх сувязях са Стэфанам Эрыксанам. "Эрыксан — мабыць, самае распаўсюджанае прозвішча ў Швецыі. У нас іх тысячы. Наколькі мне вядома, мы са шведскім амбасадарам у Беларусі не сваякі", — паведаміў заснавальнік Studio Total.
Нагадаем, Стэфан Эрыксан пакінуў Беларусь згодна з патрабаваннем беларускіх уладаў, якія не прадоўжылі яму дазвол на працу ў Беларусі.
Фота — newsdesk.com
