Былога чыноўніка Слонімскага райвыканкаму высяляюць з дому разам з сям’ёй

Як піша "Газета Слонімская", калгас хоча выселіць са службовага жылога памяшкання сям’ю былога першага намесніка старшыні райвыканкама, начальніка сельгасупраўлення Дзмітрыя Дзешкі. Пад высяленне падпадаюць сам гаспадар, яго жонка і двое няпоўналетніх дзяцей. Папярэднія слуханні адбыліся 7 верасня.

Сям'я Дзешкаў займае службовы двухпавярховік у вёсцы Тушэвічы. Яны пераехалі туды ў 2008 годзе, калі галаву сям’і прызначылі кіраваць сельскай гаспадаркай раёна. 5 красавіка 2010 года Дзмітрыя Дзешку перавялі на працу ў суседні раён. Але сям’я працягвае жыць у Тушэвічах.

5 траўня мінулага года Дзешкі атрымалі паведамленне аб вызваленні жытла. Але іншага жытла сям'я, дзе ёсць двое дзяцей-школьнікаў, не мае. Дзмітры Дзешка працуе ў калгасе "Сынковічы", там яму будуецца жытло. Але дом будзе здадзены толькі ў красавіку ці ў траўні 2012 года. Дзешкі просяць даць ім магчымасць пажыць у доме яшчэ крыху. Але калгас "Пераможац" кажа, што да іх прыехаў новы спецыяліст з сям'ёй, якому тэрмінова патрэбнае жытло.

Разгляд справы суддзя прызначыла на 15 верасня.