Д.Крэмер: Атакі на апазіцыю пазбавяць Захад ілюзіяў, што Лукашэнка змяніўся

Ён разважаў пра беларускую сітуацыю. Спадар Крэмер заявіў, што не быў шакаваны і нават здзіўлены тым, што рэжым Лукашэнкі вырашыў выкарыстаць гвалт супраць свайго ж народу, бо гэта неаднаразова адбывалася ў мінулым. Людзі зусім забыліся на тое, што адбылося ў 2006 годзе, у 2000 ці ў 1999, калі некалькі чалавек бясследна знікла. Лукашэнка пойдзе на ўсё,  каб застацца пры ўладзе, цвердзіць спадар Крэмер.

Дэвід Крэмер спадзяецца, што гэтыя атакі на апазіцыю і на журналістаў, прынамсі, дазволяць некаторым еўрапейскім і амерыканскім палітыкам пазбавіцца марных ілюзіяў, што Лукашэнка змяніўся. Лібералізацыя, якая прайшла перад самімі выбарамі, была ўсяго толькі банальным фасадам. Падзеі 19 снежня з жорсткім падаўленнем мітынгу — вось гэта сапраўдны Лукашэнка, лічыць кіраўнік “Freedom House”.

Што да спосабаў уздзеяння на беларускага лідэра, каб ён вызваліў прадстаўнікоў апазіцыі, якія трапілі ў турму пасля акцыі, дык Дэвід Крымер лічыць тут найбольш эфектыўнымі “кропкавыя санкцыі”. Праўда, на гэта таксама спатрэбіцца час. У 2006 і ў 2008 годзе яны далі вынік. Напрыклад, пасля санкцыяў супраць “Белнафтахіму” беларускія ўлады адразу пагадзіліся на перамовы з Амерыкай. Санкцыі — гэта адзіная мова, якую разумее Лукашэнка.

Пры гэтым Захад павінен перастаць турбавацца наконт таго, што Лукашэнка можа занадта наблізіцца да Расіі. Затое варта назіраць за тым, як ён абыходзіцца з беларускім народам.