Кыргызстан пагражае заваліць Беларусь кітайскім шырспажывам
Кыргызстан падаў заяўку на ўваходжанне ў Мытны саюз дзеля таго, каб замацаваць пазіцыю перавалачнай базы для кітайскіх тавараў.
Пра гэта паведаміў сакратар Мытнага саюзу Сяргей Глазьеў. Ён распавёў, што Мытны саюз быў вымушаны зрабіць больш жорсткімі правілы для тавараў з Кыргызстана, бо пад іх выглядам у МС пастаўлялі кітайскі шырспажыў.
Паводле ацэнак статкамітэта ААН, рэальны аб'ём кітайскага экспарту ў Кыргызстан складае 7 млрд долараў. "Гэта значыць, што кітайскі шырспажыў завозіцца на тэрыторыю МС пад выглядам тавараў кыргызскай вытворчасці. Мы былі вымушаныя зрабіць больш жорсткі мытны рэжым на мяжы Казахстана і Кыргызстана — усе тавары праходзяць строгі кантроль правіл паходжання", — сказаў Глазьеў.
"Урад Кыргызстана, прааналізаваўшы сітуацыю, зразумеў, што зможа захаваць ролю лагістычнага цэнтру перавалкі кітайскіх тавараў толькі ў выпадку далучэння да МС, і Бішкек ужо заявіў, што падае заяўку аб уваходжанні", — паведаміў сакратар МС ZN.UA.
