Літоўскі амбасадар выказаўся пра вызваленне беларускіх палітвязняў
Новы амбасадар Літвы ў Беларусі Лінас Лінкявічус лічыць сітуацыю ў нашай краіне неадназначнай.
У інтэрв'ю парталу DELFI.lt дыпламат адзначыў, што шкадуе пра дыялог з Беларуссю мовай ультыматумаў. На яго думку, размова ультыматумамі – гэта крайняя мера, якая часам ужываецца, але не павінна быць нормай.
Лінкявічус таксама нагадаў, што ўмова для дыялогу паміж Еўрасаюзам і афіцыйным Мінскам — вызваленне і рэабілітацыя палітвязняў. "Пра гэта гаварылася не раз, і наяўнасць гэтай праблемы адназначна ўскладняе дыялог", — адзначыў літоўскі амбасадар.
Разам з тым дыпламат лічыць Усходняе партнёрства важным сродкам для дыялогу з беларускім кіраўніцтвам. Па яго словах, пакуль што не атрымліваецца весці паўнавартасны такі дыялог і Еўрасаюз павінен пераканаць прадстаўнікоў афіцыйнага Мінску ў карысці Усходняга партнёрства.
Пазітыўным знакам Лінкявічус назваў нядаўні візіт міністра замежных справаў Сяргея Мартынава ў Брусэль.
Фота — delfi.lt
