На беларускай мяжы затрымалі расіяніна, які ішоў у Замежны легіён
23-гадовага жыхара Архангельскай вобласці затрымалі зранку 7 студзеня брэсцкія памежнікі за 600 метраў ад беларуска-польскай мяжы.
Як паведамляе БелаПАН, пры сабе малады чалавек меў асабістыя рэчы, прадукты харчавання, два несапраўдныя замежныя пашпарты Расіі і нож. Расіянін планаваў праз Польшчу дабрацца да Францыі, дзе хацеў паступіць у Замежны легіён.
Памежнікі мяркуюць, што ў расіяніна была састарэлая і памылковая інфармацыя пра тое, што для атрымання нейкага бонуса пры паступленні ў Замежны легіён неабходна незаконна перайсці мяжу. Паводле еўрапейскіх законаў, парушальнікі мяжы — нелегальныя мігранты, таму ў якасці кандыдатаў на службу не разглядаюцца.
Парушальніка затрымалі для разгляду.
Фота — film-onlin.info
