Па факце катастрофы верталёта на Пастаўшчыне распачатая крымінальная справа
Аб гэтым паведамляе Генеральная пракуратура.
Для расследавання абставінаў катастрофы створаная адмысловая следчая група, інфармуе БелаПАН. Месца падзення паветранага судна ачэпленае. На ім працягваюць працаваць спецыялісты. У асобным авіяцыйным атрадзе органаў пагранслужбы ў Паставах канфіскоўваюцца дакументы, звязаныя з тэхнічным станам верталёта і перадпалётнай падрыхтоўкай экіпажа. Расследаванне знаходзіцца на кантролі Генеральнай пракуратуры.
Нагадаем, што "Еўракоптэр" органаў пагранслужбы Беларусі са здымачнай групай тэлерадыёкампаніі "Саюз" на борце разбіўся 20 кастрычніка ў раёне вёскі Вілейты Пастаўскага раёна Віцебскай вобласці. На борце знаходзіліся пяць чалавек: два члена экіпажа і тры журналіста. Усе яны загінулі.
