Раман Бязсмертны: Шацкія азёры знішчае бізнесмен, блізкі да ўладаў Беларусі
Былы амбасадар Украіны ў Беларусі выступіў са скандальнай заявай і заклікаў да ўвядзення эканамічных санкцый супраць нашай краіны.
На прэс-канферэнцыі, прысвечанай пагрозе знішчэння Шацкіх азёраў і ўсяго Палесся, ён заявіў, што Украіна павінна выкарыстаць для ўплыву на Беларусь нават зварот у Міжнародны суд і эканамічныя санкцыі.
Нагадаем, ва Украіне заклапочаныя планамі Беларусі распрацоўваць Хаціслаўскі кар'ер для здабычы мела ў Маларыцкім раёне. Эксперты заяўляюць, што з-за гэтага могуць абмялець Шацкія азёры, размешчаныя на ўкраінскай тэрыторыі ў 12-17 кіламетрах ад кар'ера.
Раман Бязсмертны сцвярджае, што Украіна не можа паразумецца з уладамі Беларусі ў гэтай справе праз зацікаўленасць у распрацоўцы Хаціслаўскага радовішча з боку бізнесмена Юрыя Чыжа. Ён падкрэслівае яго набліжанасць да Аляксандра Лукашэнкі і робіць выснову, што з цяперашнімі ўладамі Беларусі дамовіцца не атрымаецца, інфармуе УНІАН.
Фота — svaboda.org
