Спартоваму аглядальніку адмовілі ў акрэдытацыі на хатнія гульні ХК "Брэст"
Афіцыйных тлумачэнняў пакуль няма. Але журналіст упэўнены, што яму помсцяць за крытычныя матэрыялы пра клуб.
Пра забарону прысутнічаць на брэсцкіх гульнях чэмпіянату Беларусі па хакеі Алесь Ляўчук даведаўся ад прэс-службы хакейнага клуба "Брэст". Яму паведамілі, што рашэнне прыняў асабіста дырэктар клуба Вадзім Драчоў.
Алесь Ляўчук: "Больш чым паўгода хакеісты клуба не атрымлівалі заробак і абяцалі байкатаваць бліжэйшы матч. Яны звярнуліся да мяне, і я напісаў пра гэта артыкул (на сайце champ.by — Еўрарадыё). Пасля публікацыі дырэктар пачаў выклікаць усіх гульцоў да сябе і літаральна "прэсаваць" іх. Пра гэта выйшаў ужо мой другі артыкул. Ім усё ж такі выплацілі грошы, а вінаватым застаўся я".
Дырэктар ХК "Брэст" паведаміў журналісту, што той трапіць на гульні, калі сваю асабістую згоду дасць начальнік аддзела па спорце і фізкультуры Брэсцкага аблвыканкама Мікалай Хевук. Пытанне пра акрэдытацыю Леўчука будзе разглядацца 4 верасня на адмысловым паседжанні.
Калі журналіст усё ж такі не атрымае акрэдытацыю, ён плануе абскаржваць адмову і настойваць на афіцыйных тлумачэннях.
