Сваякі Юліі Цімашэнка пачынаюць у Еўропе кампанію за яе вызваленне
Ініцыятарам кампаніі выступіў муж Юліі Аляксандр Цімашэнка.
Ён атрымаў міжнародную абарону чэшскага ўрада. Дапамагаць Аляксандру Цімашэнка будзе былы міністр эканомікі ва ўрадзе Юліі Цімашэнка Багдан Данілішын. Кіраўніком кампаніі стане дачка зняволенага экс-прэм'ер-міністра Яўгенія, паведамляе “Інтэрфакс”.
У межах кампаніі яе ініцыятары
плануюць супрацоўнічаць з многімі арганізацыямі ў Чэхіі і ў цэлым у Еўропе. Яны
хочуць не толькі прымусіць улады Украіны вызваліць Юлію Цімашэнка, але таксама
актывізаваць апазіцыю для барацьбы з Віктарам Януковічам.
Нагадаем, што Юлія Цімашэнка адбывае пакаранне ў Качаноўскай выпраўленчай калоніі № 54 у Харкаве. Пячэрскі раённы суд Кіева 11 кастрычніка 2011 года прысудзіў экс-прэм'ера да 7 гадоў пазбаўлення волі за перавышэнне паўнамоцтваў падчас падпісання газавых кантрактаў з Расіяй у 2009 годзе.
