У брэсцкай фотажурналісткі сёлета "скралі" больш за 100 здымкаў

Некалькі месяцаў на гэтым сайце без пазнакі аўтарства размяшчаліся артыкулы газеты "Брестский курьер". Не падпісвалі рэдактары сайта і адпаведныя матэрыялам здымкі, аўтарам якіх з'яўляецца штатны фотакарэспандэнт "БК" Мілана Харытонава.

Разбіральніцтва з гаспадарамі рэсурсу цягнулася некалькі тыдняў. Прадстаўнікі сайта ў перапісцы з журналісткай апраўдваліся тым, што
перадрукоўку матэрыялаў рабіла... праграма-робат. А ў яе у функцыях няма самастойнага падпісвання артыкулаў.

Аднак ліставанне не засталося бясплённым: апошнія перадрукоўкі на сайце 21.by публікуюцца ўжо з імёнамі аўтараў. Мілана Харытонава кажа, што пры паўторы "пазычальнай" практыкі дамагацца справядлівасці яна будзе ўжо праз суд. Журналістка лічыць, што сайт зарабляе на яе працы.

Харытонава: "Я не буду патрабаваць ніякіх грашовых кампенсацыяў, а толькі каб іх прымусілі падпісаць усе здымкі. То бок мне нічога не
патрэбна апроч таго, каб людзі зразумелі ў рэшце рэшт, што аўтарскае права нават у Беларусі дзейнічае. Трэба датрымлівацца пэўных правілаў і паважаць сваіх калег. Калі ты ўжо карыстаешся чужой працай, то рабі гэта прыстойна, каб пазбегнуць крыўдаў і непаразуменняў".

Фота — virtual.brest.by