У чарзе на беларуска-польскай мяжы пратэставалі кіроўцы (фота)

Як паведамляе "Віртуальны Брэст", позна ўвечары 3 жніўня перад прапускным пунктам сабралася вельмі вялікая колькасць аўтамабіляў — у 5 шэрагаў. У гэтай сітуацыі кіроўцы вінавацяць і памежнікаў, і мытнікаў, маўляў, занадта павольна працуюць. У выніку людзі павыходзілі з машын і сталі спрабаваць самастойна рэгуляваць чаргу, патрабуючы навядзення парадку.

Памежнікі былі вымушаныя выклікаць міліцыянтаў і ДАІ.  Сваю незадаволенасць пануючым бязладдзем пратэстоўцы пачалі выказваць праваахоўнікам, калі тыя прыбылі на месца.

Праз некаторы час памежнікі ўсё ж пачалі запускаць аўтамабілі на КПП, а праз паўгадзіны сітуацыя цалкам стабілізавалася. Больш спробаў узняць бунт не было.