У Гродне слінгамамы зладзілі вулічнае шэсце і фотасэсію

11/10/2010 - 10:41

Мінулы тыдзень у многіх краінах свету адзначылі пад лозунгам “Бяспечнае слінганашэнне: цешцеся перавагамі!”. Міжнародны тыдзень слінганашэння закрануў і горад над Нёманам. Святочнае сямейнае шэсце, якое прайшло 9 кастрычніка, наведала Еўрарадыё.

Смех удзельнікаў працэсіі і вулічны шум не перашкаджаў маленькай Варвары спакойна спаць у слінгу. Яе маці Яўгенія карыстаецца ім толькі 2 месяцы, але ўжо паспела ацаніць усе выгоды гэтага прыстасавання:

“Гэта называецца май-слінг. Ён больш за ўсё падобны на сучасны заплечнік. Так жа, як і ў любым слінгу, тут рэгулююцца лямкі. Дзіцё расце, і слінг можна не мяняць. Ён будзе падыходзіць”.

Бацька Варвары Андрэй таксама часам носіць сваю 5-месячную дачушку ў слінгу:

“Я таксама лічу, што гэта вельмі зручная рэч. Калі, напрыклад, мамы няма дома, кудысьці трэба выйсці — дзіцё само не пакінеш. А з вазком яго цяжка вывозіць у краму. А так атрымліваецца хутка, эканоміцца час і свабода рухаў!”

Па дарозе ад драмтэатра да парка Жылібера слінгабацькі раздавалі мінакам адмысловыя балонікі, сцяжкі ды ўлёткі з інфармацыяй пра розныя віды слінгаў. У канцы шэсця мамы зрабілі своеасаблівы сюрпрыз. Каб пераканаць выпадковых гледачоў у бяспецы і зручнасці слінга, яны станчылі разам са сваімі дзеткамі.

У арганізацыі Тыдня слінганашэння ўдзельнічала Ганна Кузняцова. На сённяшні дзень яна адзіны сертыфікаваны слінгакансультант у Гродна. Адмысловы экзамен Ганна здавала пры расійскай Асацыяцыі слінгакансультантаў. Каб атрымаць такі статус, валодаць тэорыяй гэтага майстэрства мала. Свайго сына Ганна два гады насіла ў слінгу.

“Калі ён побач, на адлегласці пацалунка, я і пакарміць яго магу, калі ён захацеў. Гэта вельмі прыемна. Я часта сустракаю бабуляў, якія гавораць, што нас у вёсцы так насілі. Са мной у доме жыве бабуля, у вёсцы якой насілі дзяцей у рушніках”, — гаворыць Ганна.

Ганна Кузняцова дапамагае маладым бацькам правільна выбраць і карыстацца слінгам, праводзіць заняткі ёгі для цяжарных і актыўна ўдзельнічае ў абмеркаваннях тэм слінгаў на мясцовым інтэрнэт-форуме.

“Часта баяцца зрабіць дзіцё ручным. Гавораць: “Носіце яго на сабе! Потым ён ручны будзе!” Я апрача таго, што слінг-кансультант, яшчэ ўрач-тэрапеў. І хачу прафесійна заявіць, што цалкам задаволеная патрэба знікае. То бок у дзіця ёсць патрэба быць залежным — хай ён пабудзе на руках, калі для яго гэта фізіялагічна натуральна. Потым гэта дапаможа яму быць больш самастойным”, — пракаментавала Ганна Кузняцова.