У Грузіі адбываюцца парламенцкія выбары на фоне "турэмнага скандалу"
На выбары ідзе кіруючая партыя, "Адзіны нацыянальны рух", якая падтрымлівае Саакашвілі.
Самым сур'ёзным яе канкурэнтам лічыцца апазіцыйная кааліцыя мільярдэра Бідзіны Іванішвілі "Грузінская мара", перадае ВВС.
Гэтыя выбары маюць вялікае значэнне. Ужо ў наступным годзе, пасля прэзідэнцкіх выбараў, парламент і прэм'ер-міністр атрымаюць значна больш паўнамоцтваў, чым прэзідэнт. У адпаведнасці з новымі зменамі ў канстытуцыі краіны, урад стане найвышэйшым органам выканаўчай улады. Прэзідэнт будзе толькі фармальна прапаноўваць кандыдатуры на пасаду прэм'ера, і толькі тыя, якія яму першапачаткова прапануе парламент.
Выбары праходзяць на хвалі грамадскіх пратэстаў, выкліканых "турэмным скандалам". Нагадаем, што два тыдні таму былі абнародаваныя факты здзеку і сэксуальнага гвалту супраць вязняў адной з тбіліскіх турмаў. Гэты скандал істотна падарваў пазіцыі Саакашвілі і кіруючай партыі.
