У музейнага комплекса “Мірскі замак” з'явілася дырэктарка
Конкурс, аб’яўлены Міністэрствам культуры, доўжыўся ад снежня 2011 года.
Цяпер яго вынікі зацверджаныя. Брэстаўчанка Вольга Папко перамагла, дзякуючы высокай кампетэнтнасці, мяркуе газета “Вечерний Брест”.
Спадарыня Папко — кандыдат гістарычных навук, валодае англійскай, нямецкай, польскай мовамі. Была на стажыроўцы ў Заходняй Еўропе. Вольга Папко мае некалькі грунтоўных прац у галіне радзівілазнаўства. Многія яе працы напісаныя на беларускай мове, якой яна свабодна валодае. Апошнім часам спадарыня Папко займала пасаду дацэнта кафедры філасофіі і культуралогіі Брэсцкага тэхнічнага ўніверсітэта.
Міністэрства культуры паставіла перад новым дырэктарам задачу — падняць у Мірскім музеі ўзровень навуковай працы. Сабе дырэктарка намеціла яшчэ і папулярызатарскі праект — яна хоча зладзіць на 200-я ўгодкі паходу Напалеона рэканструкцыю бітвы пад Міром.
