Спецслужбы Кыргызстану заявілі, што раскрылі змову апазіцыі

Супрацоўнікі Дзяржаўнага камітэта нацыянальнай бяспекі заяўляюць, што пра змову ім паведаміў нейкі Эрланбек Амураліеў. Па яго словах, група асобаў напрыканцы жніўня правяла нараду. На ёй было вырашана арганізаваць з 8 па 10 верасня ў мясцовасці Куубакы акцыю пратэсту і перакрыць аўтатрасу Бішкек-Каракол у Ісык-Кульскай вобласці. Таксама планаваўся падвоз падручных сродкаў, камянёў і арматуры для супраціву ўладам і праваахоўным органам.

Акрамя таго, Амураліеў паведаміў, быццам апазіцыя планавала скінуць у раку Нарын атрутныя хімічныя парашкі ў мяхах з надпісам "цыянід", каб вада змяніла колер. Гэта падманула б грамадскасць і выклікала масавыя акцыі пратэсту.

Спецслужбы Кыргызстану заклікалі грамадзян краіны павысіць пільнасць, перадае РБК.

Дарэчы, запланаваныя акцыі пратэсту мусілі прайсці ў дні, калі ў Бішкеку прызначаны саміт кіраўнікоў дзяржаў Шанхайскай арганізацыі супрацоўніцтва. У тыя дні з афіцыйным візітам у краіне будуць знаходзіцца прэзідэнт Расіі Уладзімір Пуцін, старшыня КНР Сі Цзіньпін і новы прэзідэнт Ірана Хасан Раўхані.

Фота — centralasiaonline.com