У Віцебску адкрываецца аддзяленне рэабілітацыі інвалідаў па зроку

Аддзяленне рэабілітацыі інвалідаў па зроку адкрываецца ў Віцебску. Паводле статыстычных звестак, штогод у вобласці каля 130 чалавек становяцца інвалідамі па зроку.  З Віцебску паведамляе нашая карэспандэнтка Ядвіга Сташэўская: 

"Цэнтр рэабілітацыі інвалідаў па зроку хутка пачне сваю працу ў абласным цэнтры сацыяльнага абслугоўвання. На працягу месяца людзей, якія згубілі зрок, будуць вучыць жыць наноў, з імі будуць працаваць псіхолагі і іншыя спецыялісты. Адначасова рэабілітацыю будуць праходзіць 10 чалавек. Гэта - першая ў краіне ўстанова такога кшталту".

У абласной арганізацыі таварыства інвалідаў па зроку гавораць, што найперш сацыяльная і псіхалагічная рэабілітацыя патрэбна жыхарам вёсак, якія страчваюць зрок. Па месцы жыхарства большасць такіх людзей не маюць магчымасці атрымаць дапамогу спецыялістаў.

Ядвіга Сташэўская, Еўрарадыё, Віцебск