Адам Глобус можа патраціць на вопратку і касметыку 10 тысяч еўра ў месяц

Іван Айплатаў, дызайнер: “У чыстым выглядзе я сябе метрасэксуалам не лічу. Касметыкай карыстаюся, але ў разумных межах. У мяне ёсць некалькі знаёмых, тыповых метрасэксуалаў, з якімі мне не параўнацца. У асноўным карыстаюся касметыкай маркі Clinique, гэта туалетная вада і ўвогуле касметыка гэтай фірмы. Наконт шмат трачу ці не — гэта ўсё індывідуальна”. 

Былому сенатару, генералу і пісьменніку Мікалаю Чаргінцу праца замінае прысвячаць шмат часу знешнасці.

Мікалай Чаргінец, старшыня афіцыйнага Саюза пісьменнікаў: “Я карыстаюся адэкалонам пасля галення, не памятаю назвы, але імпартны, добры пах. Я крыху магу ім папырскаць — і усё. Салярый мне не патрэбен, у мяне ёсць парылка на лецішчы і басейн невялікі. Яшчэ зарадка шторанку. У сярэднім на месяц выдаю 50-60 долараў, а адэкалон стаіць месяцы два-тры, я не вельмі люблю рэзкія пахі. Нават калі жанчыны моцна пахнуць, мне не падабаецца. А ў маіх духоў тонкі пах, і я часта чую кампліменты ад жанчын пра тое, якія яны смачныя. Сябе метрасэксуалам не лічу, бо ўсё жыццё прайшло ў працы, няма часу гэтым займацца”.

Адам Глобус часам бывае вельмі шчодры і выдаткоўвае тысячы еўра на касметычныя сродкі.

Адам Глобус, пісьменнік, выдавец: “Не, касметыкай не карыстаюся. Парфумай я дома карыстаюся, гэта французская марка Vichy, ну да таго ж карыстаюся ўсім, што звязана з галеннем. У салярый не хаджу, нам радыяцыі хопіць і без салярыя. Сонца не хапае, але даводзіцца падарожнічаць. Але я дбаю пра сябе, кожны дзень бегаю і раблю зарадку, зараз падвярнуў нагу, таму вельмі некамфортна сябе адчуваю. А цяпер яшчэ кінуў паліць, і таму трэба змагацца яшчэ з лішкамі вагі, што стала вельмі нечаканай праблемай. Ніколі такога не было, а пасля пяцідзесяці ўзнікла. Купляю сабе вопратку, касметыку, шампунь магу доўга выбіраць. Неяк я патраціў на сябе ў месяц дзесяць тысяч еўра — але гэта максімум”. 

Паша Гарадніцкі з гурта РСП любіць, калі касметыку яму дараць:

Паша Гарадніцкі, акцёр “Свабоднага тэатру”, музыка “Разбітае Сэрца Пацана”: “Я карыстаюся касметыкай, вось учора мне падаравалі тры такія штукі — крэм супраць зморшчын для тлустай камбінаванай скуры. Прынеслі ў тэатр каробку, і я сабе ўзяў, праверыць, як яно дзейнічае. Але яшчэ не спрабаваў. Яшчэ карыстаюся дэзадарантам маркі Axe — дынны водар, таму з-пад пахаў у мяне цяпер дыняй пахне. Заходжу ў ліфт і прадаўцы дынямі проста млеюць. Салярый не наведваю, а вось пілінг мне жонка робіць, ну, прынамсі рабіла да вяселля. Вельмі падабаецца, стаў іншым чалавекам, скура абнаўляецца. Гэта падарункі, таму пакуль ніколькі грошай на гэта не выдаткоўваю. У метро ні разу гэтага не рабіў, таму метрасэксуалам сябе не лічу”. 

Ніхто з апытаных пра беларускую касметыку не абмовіўся. А дарэмна: прынамсі, "Вітэкс" і "Беліта" прапануюць па некалькі комплексаў поўнага догляду за мужчынскім тварам, валасамі і целам. І пераконваюць: гэта міф, што мужчынам касметыка не патрэбная, бо яны менш старэюць. Скура мужчынаў, праўда, больш тоўстая і таму вытрымлівае большыя нагрузкі. Затое яна больш успрымальная для запаленчых працэсаў, тлусцейшая і падвяргаецца штодзённаму стрэсу галення. Пра аблысенне і згадваць не варта.  На адну лысую жанчыну прыпадае дзясяткі лысых мужчын. А між тым касметолагі кажуць, што аблысенне можна прынамсі затрымаць мэтава падабранай касметыкай.