На школьніка, які "замініраваў" суседнюю школу, пачалі крымінальную справу

Пра гэта інфармуе БелаПАН са спасылкай на мінскую гарадскую міліцыю.

Як паведамляла Еўрарадыё, здарэнне адбылося 21 сакавіка. Каля 13-й гадзіны па спецлініі 102 з вулічнага таксафона затэлефанаваў невядомы і паведаміў пра выбуховае прыстасаванне, закладзенае ў сярэдняй школе №173 па вуліцы Герасіменкі, 48. Міліцыянты і група размініравання абследавалі будынак школы, але выбуховае прыстасаванне не знайшлі. З будынка былі эвакуяваныя 580 чалавек.

Супрацоўнікі крымінальнага вышуку і інспекцыі па справах непаўналетніх выявілі, што ілжывую інфармацыю паведаміў 15-гадовы вучань іншай сярэдняй школы. Яго затрымалі і пасля правядзення следчых дзеянняў перадалі бацькам.

Дарэчы, за падобны ўчынак пагражае штраф — да 6 млн 500 тысяч рублёў. Да яго дадаецца кампенсацыя за працу спецыяльных службаў. Штраф (да 2 млн 600 тысяч) пагражае і бацькам хлопца.  

Фота — Fotolia