Польшча адмяніла консульскі збор за нацыянальную візу для беларусаў

Як заявіў 29 снежня 2010 года міністр замежных спраў Польшчы Радослаў Сікорскі, "гэты захад дэманструе салідарнасць з беларускім народам, які 19 снежня даслаў моцны сігнал усім дэмакратычным сілам пра неабходнасць дапамогі".

У сваю чаргу прэс-сакратар польскага МЗС Марцін Басацкі падкрэсліў: "Мы хочам дапамагчы нашым суседзям ва ўмацаванні еўрапейскай самаідэнтыфікацыі праз кантакты з палякамі і іншымі грамадзянамі Еўрасаюза".

У польскім МЗС адзначылі, што кошт нацыянальнай візы ў Польшчу для беларусаў складаў 20 еўра.

Варта адзначыць, што нацыянальныя візы выдаюцца толькі для працяглага знаходжання на тэрыторыі Польшчы. Шэнгенскія візы коштам 60 еўра выдаюцца польскімі консульствамі для кароткачасовага знаходжання ў Польшчы і іншых краінах Шэнгенскага пагаднення.