Пракуратура: Студэнт на ўроку фізкультуры памёр ад слабога сэрца

Пракуратура Заводскага раёна сталіцы адмовілася пачынаць крымінальную справу з нагоды смерці на ўроку фізкультуры студэнта Мінскага інстытута кіравання. Як нагадвае БелаПАН, трагедыя адбылася ўвечары 14 верасня. 20-гадоваму студэнту падчас бегу стала дрэнна, і ён сканаў. Пракуратура вырашыла не пачынаць справу ў сувязі з адсутнасцю складу злачынства. Па звестках экспертызы, смерць наступіла ў выніку вострай сардэчна-сасудзіннай і лёгачнай недастатковасці, абумоўленай прыроджанымі заганамі развіцця сэрца і сасудаў.

На цяперашні час Міністэрства аховы здароўя высвятляе, чаму, нягледзячы на хваробу, студэнт не быў вызвалены ад фізічных нагрузак.