Барыса Хамайду ў Віцебску за сцяг аштрафавалі на мільён рублёў
Барыса Хамайду аштрафавалі на 1 мільён 50 тысяч рублёў (30 базавых велічынь) за правядзенне “несанкцыяванага пікету” ля так званага “сіняга дому”.
Там віцебскі апазіцыянер традыцыйна распаўсюджвае незалежную прэсу.
Суддзя суда Чыгуначнага раёна Алена Цыганкова не знайшла правапарушэння ў тым, што спадар Хамайда, знаходзячыся на сваім звыклым месцы, меў пры сабе бел-чырвона-белы сцяг. Тады справу передалі іншаму суддзі – Уладзіславу Шыкарову. Той вырашыў, што Хамайда ўсё ж такі праводзіў пікет, бо сцяг прыцягваў ўвагу мінакоў.
Тым не менш віцебскі апазіцыянер збіраецца некалькі разоў на месяц выходзіць да “сіняга дома” з бел-чырвона-белым сцягам. Такім чынам ён здзяйсняе абвешчаную ім у гонар 20-годдзя незалежнасці беларускай дзяржавы акцыю “2011 год – год нацыянальнага сцяга”.
