Беларуса могуць асудзіць за кантрабанду ў Расію сродку для пахудання
Расійскія паліцыянты спынілі канал кантрабанднага паступлення з Беларусі ў Ніжагародскую вобласць біялагічна актыўных дадаткаў для зніжэння вагі.
У гэтых БАДах было рэчыва сібутрамін, пішуць расійскія СМІ. Сібутрамін дазволены ў Беларусі, але забаронены ў Расіі.
Рэгулярнай кантрабандай сродку для пахудання займаўся 27-гадовы брэстаўчанін, праваднік цягніка “Брэст-Навасібірск”. Раней мужчына ўжо быў асуджаны ў Беларусі за хуліганскія дзеянні.
На яго пачалі крымінальную справу за незаконны абарот моцнадзейных ці атрутных рэчываў з мэтай збыту.
Сібутрамін, дарэчы, мае шэраг пабочных дзеянняў: бессань, галаўны боль, павышэнне ціску, парушэнне працы нырак і пячонкі, запаволенне хуткасці рэакцый. Ён можа выклікаць прывыканне. Могуць з'яўляцца і іншыя цяжкія наступствы, аж да смяротнага выніку.
Фота — kakmed.com
