Беражкоў: Федэрацыя футболу не будзе ўмешвацца ў публікацыі "Прессбола"

Яно з'яўляецца заснавальнікам вядомай газеты.

Галоўны рэдактар "Прессбола" Уладзімір Беражкоў кажа, што газета не памяняе свой змест у сувязі з цяперашнімі пераменамі.

Беражкоў: "Паводле Закону аб СМІ, рэдакцыяй кіруе галоўны рэдактар. Ён жа фармуе творчы калектыў. І сёння ў нас ёсць поўнае разуменне, што федэрацыя не ўмешваецца ў творчую палітыку выдання. Яна ўжо сфармаваная і застанецца такой, як і раней, якой прызвычаіліся бачыць яе чытачы".

Беражкоў кажа, што спадзяецца на павелічэнне папулярнасці выдання — як у папяровай, так і ў інтэрнэт-версіі.

Нагадаем, што "Прессбол" пачаў шукаць новых інвестараў у лістападзе мінулага года. Галоўны рэдактар кажа, што газета атрымала шмат прапановаў. Але прапанова Беларускай федэрацыі футболу падалася найбольш прымальнай, бо БФФ не хоча захапіць "Прессбол" і атрымаць кантрольны пакет.