Была гімназія для таленавітых дзяцей — стала кадэцкая вучэльня

02/09/2011 - 18:10

Лужаснянскай гімназіі, дзе навучаліся таленавітыя дзеці з усёй Віцебскай вобласці, больш няма. Першага верасня яна адчыніла дзверы для сваіх навучэнцаў ужо як новая навучальная ўстанова — Віцебская кадэцкая вучэльня.

Асноўнай прычынай гэтай рэарганізацыі быў названы рост колькасці навучальных устаноў такога кшталту ў раёнах Віцебскай вобласці. І ў сувязі з гэтым — неабходнасць пошуку новых форм для прыцягнення навучэнцаў у Лужасна. Як запэўніў прысутных дырэктар кадэцкай вучэльні Уладзімір Шыцько, рэарганізацыя кардынальна не зменіць навучальны працэс і тыя дзеці, якія ў свой час паступілі ў гімназію, скончаць навучанне ў звыклым для іх фармаце.

Уладзімір Шыцько: "Дзеці, якія навучаліся ў гімназіі, плаўна пераходзяць. Мы проста апранулі іх у форму. Але накірункі застаюцца, і тыя таленавітыя дзеці, якія тут займаліся, будуць спакойна працягваць адукацыю.

Якраз я сказаў, што дзяўчынак мы таксама набіраем. Адзінае што — адбор будзе больш жорсткім. Але настаўнікі — тыя, што былі, тыя і застануцца. Тыя дзеці, якія вучыліся ў гімназіі, там і застануцца, нягледзячы на тое, што мы перайшлі ў новы статус. Па тых жа праграмах і планах, што былі ў гімназіі...

Нашу гімназію закончыла прыблізна 1100 чалавек і амаль усе паступілі ў ВНУ. Я думаю, што і ў новым статусе мы горш працаваць не будзем".

Аднак бацькі навучэнцаў ставяцца да змены шыльды пакуль што вельмі насцярожана.

Маці аднаго з навучэнцаў: "Вядома, мы не вельмі гэтага хацелі. Адназначна. Але што рабіць? Мы ведаем, што настаўнікі тут вельмі моцныя. Але ж усё адно праграма адрозніваецца!"

Ці захавае пасля рэарганізацыі лужаснянская навучальная ўстанова свой статус самай сур’ёзнай школы абласнога цэнтра, пакажа час. На ўрачыстай лінейцы былі агучаныя прозвішчы вядомых людзей, што ў свой час таксама былі кадэтамі. Узначаліў спіс пісьменнік Максім Гарэцкі, замкнуў — губернатар вобласці Аляксандр Косінец.