Гродзенскія калегі Анджэя Пачобута звярнуліся да пракурора вобласці
Афіцыйную заяву на імя пракурора Гродзенскай вобласці Віктара Марозава даслалі 6 красавіка каля 20 гродзенскіх журналістаў.
Сябры гродзенскай філіі “Беларускай асацыяцыі журналістаў” падкрэсліваюць, што крымінальная справа супраць Пачобута — адзін з этапаў сістэмнай палітыкі дыскрымінацыі журналістаў недзяржаўных СМІ.
"Мы выказваем салідарнасць з нашым калегам Андрэем Пачобутам — сумленным журналістам, які выконвае свой прафесійны ды грамадзянскі абавязак”, — пішуць яны ў звароце.
Тым часам сёння ў пракуратуру ў якасці сведкі выклікалі жонку Анджэя Пачобута Аксану. Яна да следчага Арсенія Нікольскага прыйшла з адвактам і адмовілася даваць паказанні супраць свайго мужа. На гэтым допыт скончыўся.
Нагадаем, карэспандэнта “Газеты Выборчай” Анджэя Пачобута падазраюць у абразе кіраўніка Беларусі. Падставай для гэтага сталі артыкулы журналіста ў “Газеце Выборчай”, на сайце “Беларускі партызан” і ў асабістым блогу poczobut.livejournal.com.
