Пакінуты ў магілёўскім тралейбусе дыпламат "размініравалі" сапёры
14 красавіка ў абедзены час кандуктарка тралейбуснага маршрута №5 знайшла ў салоне пакінуты без прыгляду дыпламат. Жанчына адразу выклікала міліцыю.
Праваахоўнікі ачапілі частку прывакзальнай плошчы, дзе стаяў тралейбус. На месца здарэння прыехалі медыкі, выратавальнікі ды следча-аператыўная група.
Як перадае тэлерадёкампанія “Магілёў”, праз пэўны час знайшоўся і ўладар дыпламата. Гэта быў звычайны пенсіянер, які выпадкова забыўся ў тралейбусе свае рэчы.
Па словах магілёўца, ён ехаў на лецішча і, задумаўшыся, забыўся на дыпламат. У ім аказаліся ежа і бялізна. Пенсіянеру вярнулі ягоныя рэчы ды адпусцілі.
