Сёння Міжнародны валютны фонд заслухае справаздачу па Беларусі
Ад яе будзе залежаць выдзяленне крэдыту нашай краіне.
Рада дырэктараў Міжнароднага валютнага фонду мяркуе сёння разгледзець вынікі місіі па маніторынгу Беларусі. Афіцыйны Мінск разлічвае прыцягнуць ад 3,5 да 8 мільярдаў долараў крэдыту МВФ. Заяўку на выдзяленне стабілізацыйнага крэдыту урад і Нацыянальны банк Беларусі накіравалі яшчэ 31 траўня. Эксперты сцвярджаюць, што шанцы атрымаць грошы ад МВФ у Беларусі невялікія. Неабходныя рэформы эканомікі так і не былі праведзеныя. Нагадаем, што з гэтай жа прычыны пад пытаннем аказалася выдзяленне Беларусі чарговага транша крэдыту ЕўрАзЭс. Што праўда, сума там нашмат меншая — усяго 400 мільёнаў долараў.
