Сталічная міліцыя ставіла ўльтыматум 70 маладзечанскім фанатам
Здарэнне адбылося на стадыёне Белдзяржуніверсітэта пасля заканчэння матчу 4-га тура другой лігі чэмпіянату Беларусі "Зорка-БДУ" — "Забудова".
У другім тайме сектар фанатаў з Маладзечаншчыны раптам зацягнула дымам. Супрацоўнікі міліцыі папрасілі 70 заўзятараў "Забудовы" не пакідаць сваіх месцаў пасля фінальнага свістка, бо збіралася знайсці чалавека, які нешта падпаліў на трыбуне. У выніку, фанатам паставілі ўльтыматум: альбо выдаеце зламысніка, альбо ўсе правядзеце ноч у ізалятары. Вінаватага, якому няма яшчэ 18-ці гадоў, знайшлі, але не пакаралі.
Як піша "Рэгіянальная газета", усе маладзечанскія заўзятары паспяхова вярнуліся ў родны горад.
Дарэчы, матч закончыўся з лікам 4:1 на карысць "Зоркі-БДУ".
