У аўтааварыі пад Малой Бераставіцай загінуў памежнік (абноўлена сведчаннем)

Як паведамляе Гродзенскі блог S13, "газель" памежнікаў, якая ехала да пункту пропуску, пайшла на абгон. На сустрэчнай паласе яна ў лоб сутыкнулася з іншым аўтамабілем. У аварыі загінуў памежнік, 7 чалавек параненыя, з іх 3 чалавекі ў цяжкім стане.

Як паведаміла ў жывым эфіры Еўрарадыё відавочца Бажэна, якая была каля месца аварыі, вінаватым у аўтакатастрофе стаў кіроўца, які выехаў на сустрэчную паласу насустрач памежнікам. Па яе словах, хутчэй за ўсё, пацярпелых у аварыі павезлі ў лякарню ў Гродна.

Бажэна: Аварыя адбылася паміж Алекшыцамі і Вялікай Бераставіцай. Інспектары ДАІ кажуць, Passat выйшаў за забароненую суцэльную лінію аб'езду, выйшаў на сустрэчную пад горку, урэзаўся ў “Газель” памежнікаў. На месцы памёр супрацоўнік памежнай службы. Усе астатнія засталіся жывыя і іх забралі ў хуткую. Цяпер вяртаюся з Вялікай Бераставіцы, грузілі ўжо машыны, сабралася вельмі шмат людзей, і канстатавалі аварыю.
Еўрарадыё: Кіроўца Passat застаўся жывы?
Бажэна: І кіроўца і пасажыр засталіся жывымі.
Еўрарадыё: Як выглядае месца аварыі?
Бажэна: Былі інспектары ДАІ, было вельмі шмат людзей, была адразу пажарная служба. Усе знакі, фішкі стаялі. Вельмі страшна, шмат крыві і на адной машыне і на другой. Вельмі пакарабачаныя машыны.