Улады Гомеля ўстурбаваліся ідэалагічнай чысцінёй "Дзелавога інтэрнэту"
Пагражаючы не даць памяшканне, яны забаранілі выступ рэдактара сайта "Моцныя навіны" на рэгіянальнай канферэнцыі.
Заснавальніку сайта Пятру Кузняцову пра адмену яго выступу паведамілі за 2 гадзіны да здачы даклада.
Нагадаем, што ў Гомелі праходзіць першая рэгіянальная канферэнцыя "Дзелавы інтэрнэт". Сярод іншага на ёй планавалася абмеркаваць рост цікавасці да рэгіянальных навінаў. Як распавёў Кузняцоў у гутарцы з Еўрарадыё, выступіць з адпаведным дакладам прапанавалі яму. Але прапанова дзейнічала нядоўга:
Кузняцоў: "У суботу мы атрымалі паведамленне ад арганізатараў, што яны, у сваю чаргу, атрымалі паведамленне ад мясцовых уладаў: калі там буду я, то ім не дадуць памяшканне і канферэнцыя не адбудзецца. Таму яны адмовіліся ад нашага дакладу. І сёння на канферэнцыі прагучала, што самы папулярны сайт навінаў рэгіёну — гэта "Гомельская праўда". Хаця "Гомельская праўда" саступае па наведвальнасці "Моцным навінам" у восем разоў".
