У другім этапе Чэмпіянату свету па хакеі Беларусь згуляе з Канадай

На чэмпіянаце свету па хакеі ў Маскве 2 траўня завяршыўся першы этап. Вызначыліся 12 камандаў, якія працягнуць барацьбу за медалі, і чатыры зборныя, якія будуць гуляць у турніры за права застацца ў эліце.

Удзельнікі другога раўнда барацьбы за медалі падзеленыя на групы "Е" і "F". Улічаныя ачкі, набраныя ў вочных сустрэчах на першым этапе. Беларусь находзіцца ў невыгодным становішчы, паколькі прайграла і чэхам (2:8), і амерыканцам (1:5).

Стартавае становішча каманд у групе "F", дзе гуляюць беларусы:

Чэхія – 6 (12-5),

Канада – 6 (8-6),

Славакія – 3 (9-6),

ЗША – 3 (8-5),

Нямеччына – 0 (3-8),

Беларусь – 0 (3-13).

Чатыры лепшыя каманды з кожнай групы працягнуць барацьбу ў чвэрцьфінале.

Першым супернікам беларускай зборнай на другім этапе чэмпіянату свету па хакеі стане каманда Канады – матч адбудзецца 4 траўня. 6-га Беларусь згуляе са Славакіяй, 7-га – з Нямеччынай. Усе матчы пачынаюцца ў 15.15 па мінскім часе.